திருவள்ளுவர் தின விருதுகள்.. 9 பேருக்கு விருதுகள்.. ஜனவரி. 15ம் தேதி சென்னையில் வழங்கப்படும்

Jan 05, 2025,02:46 PM IST

திருவள்ளுவர் திருநாளன்று தமிழ்நாடு அரசால் வழங்கப்படும் 9 விருதுகளுக்குரிய பிரமுகர்களை தமிழ்நாடு அரசு தேர்வு செய்து அறிவித்துள்ளது. 2025-ஆம் ஆண்டிற்கான அய்யன் திருவள்ளுவர் விருது, 2024-ஆம் ஆண்டிற்கான மகாகவி பாரதியார் விருது, பாவேந்தர் பாரதிதாசன் விருது, தமிழ்த்தென்றல் திரு.வி.க விருது, முத்தமிழ்க்காவலர் கி.ஆ.பெ. விசுவநாதம் விருது, பேரறிஞர் அண்ணா விருது, தந்தை பெரியார் விருது, அண்ணல் அம்பேத்கர் விருது, முத்தமிழறிஞர் கலைஞர் விருது ஆகிய 9 விருதுகளுக்குரிய பிரமுகர்கள் அறிவிக்கப்பட்டுள்ளனர்.

1 / 10
Share

Image Courtesy: X

திருவள்ளுவர், பாரதியார், பாரதிதாசன், திருவிக, கி.ஆ.பெ. விசுவநாதம், அண்ணா ஆகியோர் பெயரிலான விருது பெறுவோருக்கு தலா ரூ. 2 லட்சம் பரிசுத் தொகையும், ஒரு சவரன் தங்கப் பதக்கம், பொன்னாடை ஆகியவை வழங்கிக் கெளரவிக்கப்படுவர். தந்தை பெரியார், அன்னல் அம்பேத்கர் விருது பெறுவோர் தலா ரூ. 5 லட்சம் ரொக்கப் பரிசு மற்றும் ஒரு சவரன் தங்கப்பதக்கம், தகுதியுரை வழங்கியும் பொன்னாடை அணிவித்தும் சிறப்பிக்கப்பெறுவார்கள். முத்தமிழறிஞர் கலைஞர் விருது பெறுபவர் விருதுத் தொகையாக ரூபாய் பத்து லட்சம், ஒரு சவரன் தங்கப்பதக்கம், தகுதியுரை வழங்கியும் பொன்னாடை அணிவித்தும் சிறப்பிக்கப்பெறுவார். இவர்களுக்கு ஜனவரி 15ம் தேதி சென்னையில் நடைபெறும் திருவள்ளுவர் திருநாளன்று முதல்வர் மு.க.ஸ்டாலின் விருது வழங்கிக் கெளரவிப்பார்.

2 / 10
Share

Image Courtesy: X

அய்யன் திருவள்ளுவர் விருது - திருக்குறள் நெறி பரப்பும் பெருந்தகையாளர் ஒருவரைத் தெரிவு செய்து திருவள்ளுவர் விருது 1986ஆம் ஆண்டு முதல் வழங்கிச் சிறப்பிக்கப்பட்டு வருகிறது. இதுகாறும் 39 அறிஞர்கள் இவ்விருதினைப் பெற்றுள்ளனர். அவ்வரிசையில் 2025ஆம் ஆண்டுக்கான திருவள்ளுவர் விருதுக்கு “திருக்குறள் என்பதை கற்பது, கற்பிப்பது என்று மட்டும் இருந்துவிடாமல் அதனை வாழ்வியல் நெறியாகக் கொள்தல் வேண்டும்; குறள் காட்டும் வழியில் நாம் வாழ்தல் வேண்டும்; பிறருக்கு வழிகாட்ட வேண்டும்; வாழ்க்கையில் நடைபெறும் அனைத்து இன்பத் துன்ப நிகழ்வுகளையும் குறளாயத் தமிழ் முறைப்படி நடத்த வேண்டும்; குறள் வழி குடியரசு அமைப்போம் ஆகிய கொள்கையைக் கொண்டு செயலாற்றிவரும் செந்தமிழ்ச் செம்மல் பெரும் புலவர் மு. படிக்கராமு அவர்கள் தெரிவு செய்யப்பட்டுள்ளார்.

3 / 10
Share

Image Courtesy: X

மகாகவி பாரதியார் விருது - பாரதியார் புகழ் பரப்பும் வகையில் கவிதை உரைநடை நூல்களைப் படைத்தோர் பிறவகையில் தமிழ்த்தொண்டு புரிவோருக்கு மகாகவி பாரதியார் விருது 1997ஆம் ஆண்டு முதல் வழங்கப் பெற்று வருகிறது. இதுகாறும் 27 அறிஞர்கள் இவ்விருதினைப் பெற்றுள்ளனர். இவ்வரிசையில் 2024ஆம் ஆண்டுக்கான விருதுக்கு “படிக்கட்டெல்லாம் பைந்தமிழ்ப் பாடும் பச்சையப்பர் ஆடவர் கல்லூரியில் தமிழ் இலக்கியத்தில் இளங்கலை முதுகலை பயின்று கல்லூரி காலங்களிலேயே அனைத்து கவிதை போட்டிகளிலும் முதலிடம் பெற்று தமிழ் உலகமே பாராட்டிய கவிஞர் திலகமாகவும் திரைப்படங்களின் வாயிலாக இளைஞர்கள் உலகத்தில் மாபெரும் எழுச்சியையும் மகிழ்ச்சியையும் தன் திரை வரிகளால் உள்ளங்கவர் கவிஞராக பீடு நடை போடும் கவிஞர் கபிலன் அவர்கள் தெரிவு செய்யப்பட்டுள்ளார்.

4 / 10
Share

Image Courtesy: X

பாவேந்தர் பாரதிதாசன் விருது - தமிழ்க் கவிஞர் ஒருவருக்கு பாவேந்தர் பாரதிதாசன் விருது 1978ஆம் ஆண்டு முதல் வழங்கப்பட்டு வருகிறது. மேலும் பாவேந்தர் நூற்றாண்டு தொடக்கவிழா மற்றும் நிறைவு விழாவில் வழங்கப்பட்ட விருதுகளோடு சேர்த்து இதுகாறும் 88 அறிஞர்களுக்கு வழங்கப்பட்டுள்ளது. இவ்வரிசையில் 2024ஆம் ஆண்டுக்கான விருதுக்கு “கல்லூரி மாணவராய் விளங்கியபோதே கவிதை நூல் வெளியிட்டவரும் சென்னை மாநிலக் கல்லூரியில் தமிழ்ப் பேராசிரியராகக் கடமையாற்றி ஓய்வு பெற்றவரும் நாமக்கல் கவிஞர் இராமலிங்கம் பிள்ளை மற்றும் கவியரசு கண்ணதாசன் ஆகியோரின் பாராட்டுகளோடு முத்தமிழறிஞர் கலைஞர் அவர்களால் பாராட்டப் பெற்றவருமான கவிதைப் பேரொளி பொன். செல்வகணபதி அவர்கள் தெரிவு செய்யப்பட்டுள்ளார்.

5 / 10
Share

Image Courtesy: X

தமிழ்த் தென்றல�� திரு.வி.க. விருது - சிறந்த தமிழ் எழுத்தாளர் ஒருவருக்கு தமிழ்த் தென்றல் திரு.வி.க. விருது 1979ஆம் ஆண்டு முதல் வழங்கப்பெற்று வருகிறது. இதுகாறும் 45 அறிஞர்களுக்கு இவ்விருது வழங்கப்பட்டுள்ளது. இவ்வரிசையில் 2024ஆம் ஆண்டுக்கான விருதுக்கு “பள்ளிப் படிப்பு முதற்கொண்டே பொதுவாழ்வு நடவடிக்கைகளில் ஆர்வம் காட்டிவருபவரும் சமூக சமத்துவத்திற்கான மருத்துவர்கள் சங்கத்தை நிறுவி, அவ்வமைப்பின் பொதுச் செயலாளராக செயல்பட்டு வருபவரும் முன்னாள் முதலமைச்சர் முத்தமிழறிஞர் கலைஞர் அவர்களின் நூற்றாண்டை முன்னிட்டு, டாக்டர் கலைஞரும் சமூக நீதியும் என்ற தலைப்பில் அமைக்கப்பட்ட குழுவில் செயல்பட்டவரும் பல்வேறு நாளிதழ்களிலும், இதழ்களிலும் சமூகப் பொருளாதார அரசியல் கருத்துக்களை குறித்தும், மருத்துவ அறிவியல் பொருண்மைகள் குறித்தும் ஏராளமான கட்டுரைகளையும், பல்வேறு தலைப்புகளில் குறுநூல்களையும் எழுதியவருமான மருத்துவர் ஜி.ஆர்.இரவீந்திரநாத் அவர்கள் தெரிவு செய்யப்பட்டுள்ளார்.

6 / 10
Share

Image Courtesy: X

முத்தமிழ்க் காவலர் கி.ஆ.பெ. விசுவநாதம் விருது - சிறந்த தமிழறிஞர் ஒருவருக்கு முத்தமிழ்க் காவலர் கி.ஆ.பெ. விசுவநாதம் விருது 2000ஆம் ஆண்டு முதல் வழங்கப்பட்டு வருகிறது. இதுகாறும் 22 அறிஞர்களுக்கு இவ்விருது வழங்கப்பட்டுள்ளது. இவ்வரிசையில் 2024ஆம் ஆண்டுக்கான விருதுக்கு “தமிழ் மாணவர் கழகம், திராவிட மாணவர் கழகம், தமிழிசை இயக்கம், தமிழியக்கம், பகுத்தறிவாளர் கழகம், கைலாசபதி இலக்கிய வட்டம், ஓர்மை, இலக்கு ஆகிய இயக்கங்களில் பணியாற்றியவரும் தமிழ் நாட்டரசின் கலைஞர் நூற்றாண்டு - கலைஞர் எழுத்தாளர் குழு உறுப்பினராகவும் பணியாற்றிய வே.மு.பொதியவெற்பன் அவர்கள் தெரிவு செய்யப்பட்டுள்ளார்.

7 / 10
Share

Image Courtesy: X

பேரறிஞர் அண்ணா விருது - பேரறிஞர் அண்ணா விருது 2006ஆம் ஆண்டு முதல் வழங்கப்பட்டு வருகிறது. இதுகாறும் 18 அறிஞர்களுக்கு இவ்விருது வழங்கப்பட்டுள்ளது. அவ்வரிசையில் 2024ஆம் ஆண்டுக்கான விருதுக்கு “திராவிட இயக்கக் குடும்பத்தில் பிறந்து பேச்சுக்கு இணையாக எழுத்தையும் ஆயுதமாகக் கொண்டவரும், எளிய விவசாய குடும்பப் பின்னணியில் இருந்து வந்தவரும், சட்டம் பயின்று சுதந்திர இந்தியாவை அதிரவைத்த மாணவர் போராட்டமான இந்தி ஆதிக்க எதிர்ப்பு போராட்டத்தில் முக்கியமான பங்கு வகித்தவரும் மாணவர்களுக்கும் திராவிட முன்னேற்றக் கழகத்திற்கும் இடையே பாலமாகவும் போராட்ட ஒருங்கிணைப்பாளராகவும் செயல்பட்டவரும் அண்ணாவை தலைவராகவும் திராவிட சித்தாந்தத்தை கொள்கையாக ஏற்றுக் கொண்டவரும் சட்டமன்ற, நாடாளுமன்ற உறுப்பினராகப் பணியாற்றியவருமான தஞ்சாவூர் மாவட்டம் ஒரத்தநாடு அருகே உள்ள கண்ணந்தங்குடி கீழையூர் கிராமத்தில் பிறந்த எல். கணேசன் அவர்கள் தெரிவு செய்யப்பட்டுள்ளார்.

8 / 10
Share

Image Courtesy: X

தந்தை பெரியார் விருது - சமூக நீதி கிடைக்க பாடுபட்டவர்களைச் சிறப்பிக்கும் பொருட்டு தந்தை பெரியார் விருது 1995ஆம் ஆண்டு முதல் வழங்கப்பட்டு வருகிறது. இதுகாறும் 29 அறிஞர்களுக்கு இவ்விருது வழங்கப்பட்டுள்ளது. அவ்வரிசையில் 2024ஆம் ஆண்டுக்கான விருதுக்கு “1969ல் மயிலாடுதுறையில் திராவிடர் கழகத்தின் இளைஞரணியில் இணைந்து பெரியாரியம் சம்பந்தமாக பொதுக்கூட்டங்கள் மற்றும் மந்திரமா? தந்திரமா? போன்ற பல பகுத்தறிவு நிகழ்ச்சிகளை நடத்தி பெரியாரின் கொள்கைகளைப் பற்றி அதிகம் பேசவும் எழுதவும் தொடங்கியவரும் பெரியாரை அழைத்து மயிலாடுதுறையில் பொதுக்கூட்டம் மற்றும் கருத்தரங்க��் நடத்தியவரும் 1970ல் ஆசிரியர் என்று அழைக்கப்படும் கி.வீரமணி அவர்களின் வழிகாட்டுதலோடு விடுதலை உண்மை ஆகிய இதழின் விநியோகப் பணியில் ஈடுபட்டவருமான விடுதலை இராஜேந்திரன் அவர்கள் தெரிவு செய்யப்பட்டுள்ளார்.

9 / 10
Share

Image Courtesy: X

அண்ணல் அம்பேத்கர் விருது - தாழ்த்தப்பட்ட மக்களின் வாழ்க்கை முன்னேற்றத்திற்கு அரிய தொண்டு செய்பவருக்கு ஆண்டுதோறும் அண்ணல் அம்பேத்கர் விருது 1998ஆம் ஆண்டு முதல் வழங்கப்பட்டு வருகிறது. இதுகாறும் 26 அறிஞர்களுக்கு இவ்விருது வழங்கப்பட்டுள்ளது. அவ்வரிசையில் 2024ஆம் ஆண்டுக்கான விருதுக்கு “எழுத்தாளர், வழக்கறிஞர் அரசியல்வாதி மற்றும் சாதி எதிர்ப்பு ஆர்வலர் என பன்முகங்களில் இயங்கி வருபவரும் அம்பேத்கார் கொள்கைகளால் ஈர்க்கப்பட்டவரும் நிறப்பிரிகை மற்றும் மணற்கேணி இதழ்களின் ஆசிரியராகத் திகழ்ந்தவரும் சட்டமன்ற நாடாளுமன்ற உறுப்பினராகப் பணியாற்றியவரும் நாகப்பட்டினம் மாவட்டத்தில் உள்ள சீர்காழி வட்டத்தில் காவிரிக்கரை கிராமமான மாங்கணாம்பட்டில் பிறந்தவருமான நாடாளுமன்ற உறுப்பினர் து. இரவிக்குமார் அவர்கள் தெரிவு செய்யப்பட்டுள்ளார்.

10 / 10
Share

Image Courtesy: X

முத்தமிழறிஞர் கலைஞர் விருது - முத்தமிழறிஞர் கலைஞர் அவர்களின் தமிழ்த் தொண்டினைப் போற்றும்வகையில் முத்தமிழறிஞர் கலைஞர் அடியொற்றி தமிழுக்குத் தொண்டாற்றும் ஒருவருக்கு வழங்கும் வகையில் “முத்தமிழறிஞர் கலைஞர் விருது” 2024இல் தோற்றுவிக்கப்பட்டது. முதன் முறையாக இவ்விருக்கு “முத்தமிழறிஞர் கலைஞர் அவர்களின் சிறப்பு உதவியாளராகப் பணியாற்றியவரும் முத்தமிழறிஞர் கலைஞர் அவர்களின் கொள்கைகளைத் தொடர்ந்து பின்பற்றுபவரும், மைசூர், இந்திய மொழிகள் நிறுவனத்தில் பணியாற்றியவரும் தேசிய கல்வி ஆராய்ச்சி பயிற்சி நிறுவனப் பணிகளில் தொண்டாற்றியவரும் வயது வந்தோர் கல்வித் துறையின் திங்களிதழில் பணியாற்றியவரும், கலைஞர் செதுக்கிய தமிழகம், தியாகிகளைப் போற்றிய தியாகச்சீலர் கலைஞர், காவிரி நீர்ப் போரில் கலைஞரும் தளபதியும் ஆகிய நூல்களை எழுதியவருமான முத்து வாவாசி அவர்கள் தெரிவு செய்யப்பட்டுள்ளார்.

சமீபத்திய செய்திகள்

Erode East.. ஈரோடு கிழக்கில் அதிமுக போட்டியா.. புறக்கணிப்பா.. ஜனவரி 11ல் முக்கிய முடிவு!

Erode East by election.. ஈவிகேஎஸ் இளங்கோவன் மகனுக்கு சீட் தரப்படுமா.. காங். நிலை என்ன?

ஈரோடு கிழக்கு இடைத்தேர்தல் : விஜய் கட்சியின் நிலைப்பாடு என்ன.. போட்டியிடுமா? போட்டியிடாதா?

டங்ஸ்டன் சுரங்கத்திற்கு கடும் எதிர்ப்பு... மதுரை தமுக்கத்தில் ஆயிரக்கணக்கில் குவிந்த விவசாயிகள்!

ஈரோடு கிழக்கு தொகுதிக்கு பிப்ரவரி 5ம் தேதி இடைத் தேர்தல்.. அறிவித்தது தேர்தல் ஆணையம்

விடை பெற்றார் ஜஸ்டின்.. அடுத்த பிரதமர் யார்.. கனடாவை அடுத்து ஆளப் போவது ஒரு தமிழ்ப் பெண்?

துணைவேந்தர் நியமனம்.. யுஜிசியின் புதிய விதிகளுக்கு முதல்வர் மு.க.ஸ்டாலின் கடும் எதிர்ப்பு

ஆளுநர் ஆர். என். ரவியைக் கண்டித்து.. திமுகவினர் ஆர்ப்பாட்டம்.. கனிமொழி உள்ளிட்டோர் பங்கேற்பு!

நேபாளத்தை உலுக்கிய 7.1 ரிக்டர் பூகம்பம்.. பலர் பலி.. டெல்லியும் ஆடியதால் மக்கள் அதிர்ச்சி

திருவள்ளுவர் தின விருதுகள்.. 9 பேருக்கு விருதுகள்.. ஜனவரி. 15ம் தேதி சென்னையில் வழங்கப்படும்

சமீபத்திய செய்திகள்

அதிகம் பார்க்கும் செய்திகள்