2024 -25 ஆம் ஆண்டுக்கான.. 3வது மோடி அரசின் முதல் பட்ஜெட்.. 22ம் தேதியா அல்லது 24ஆ?

டெல்லி: பிரதமர் நரேந்திர மோடி தலைமையிலான புதிய அரசின் 2024-25 ஆம் ஆண்டுக்கான முழு பட்ஜெட் வரும் ஜூலை 22 ஆம் தேதி அல்லது 24ம் தேதி தாக்கல் செய்யப்படும் என தெரிகிறது. தொடர்ச்சியாக, ஏழாவது முறையாக நிதி அமைச்சர் நிர்மலா சீதாராமன் பட்ஜெட் தாக்கல் செய்து புதிய சாதனை படைக்கவுள்ளார். 

பதினெட்டாவது லோக்சபா தேர்தலில் பிரதமர் நரேந்திர மோடி மூன்றாவது முறையாக வெற்றி பெற்று, பிரதமராக பொறுப்பேற்றுள்ளார். இவர் பொறுப்பேற்ற பின் முதல் கூட்டுத்தொடர் வரும் ஜூன் 24ஆம் தேதி  அதாவது திங்கட்கிழமை தொடங்கி ஜூலை மூன்று வரை நடைபெறுகிறது. இதில் முதல் மூன்று நாட்கள் புதிய உறுப்பினர்களின் பதவிப் பிரமாணம் மற்றும் சபாநாயகர் தேர்தல் 26 ஆம் தேதி நடைபெற உள்ளது. இதற்கு மறுநாள் அதாவது 27ஆம் தேதி குடியரசு தலைவர் திரௌபதி முர்மு நாடாளுமன்ற இரு அவைகளின் கூட்டுத் தொடர் கூட்டத்தில் உரையாற்ற இருக்கிறார்.

இந்த நிலையில் 2024-25ஆம் ஆண்டுக்கான முழு பட்ஜெட் வரும் ஜூலை 22ஆம் தேதி அல்லது 24ம் தேதி தாக்கல் செய்யப்பட உள்ளதாக தகவல்கள் தெரிவிக்கின்றன. 3வது மோடி அரசின் முதல் முழு பட்ஜெட் இது என்பதால் பல்வேறு முக்கிய அறிவிப்புகள் இடம் பெறலாம் என்று எதிர்பார்க்கப்படுகிறது. குறிப்பாக நாட்டின் உட்கட்டமைப்பு வளர்ச்சி குறித்த திட்டங்கள் அறிவிக்கப்படும் என எதிர்பார்க்கப்படுகிறது.