சுட்டிப் பையன் என்னெல்லாம் பண்றான் பாருங்க.. ஸ்டைலாக சுழன்ற "பிரக்யான்"

பெங்களூரு: நிலாவில் ஜாலியாக நடை போட்டுக் கொண்டிருக்கும் பிரக்யான் ரோவர், அழகாக ஸ்டைலாக சுழன்று திரும்பும் வீடியோவை இஸ்ரோ வெளியிட்டுள்ளது.

இந்தியாவின் சந்திரயான் 3 விண்கலம் நிலவில் குடியேறி அசத்தி வருகிறது. சந்திரயான் 3 விண்கலத்தின் விக்ரம் லேண்டர், நிலவின் தென் முனையில் தரையிறங்கி வரலாறு படைத்துள்ளது. இந்தப் பகுதிக்கு வந்து இறங்கிய முதல் உலக நாடு இந்தியாதான்.

இதைத் தொடர்ந்து விக்ரம் லேண்டரிலிருந்து பிரக்யான் ரோவர் தனியாக பிரிந்து வந்து தற்போது நிலவில் நடை போட்டுக் கொண்டிருக்கிறது. இதுவரை பிரக்யான் ரோவரின் செயல்பாடுகளை லேண்டரின் கேமரா படம் பிடித்து அனுப்பியது. பின்னர் பிரக்யான் ரோவர், லேண்டரைப் படம் பிடித்து அனுப்பி வைத்தது. இந்த நிலையில் தற்போது பிரக்யான் ரோவர் குறித்த புதிய வீடியோவை லேண்டர் அனுப்பியுள்ளது.

அந்த வீடியோவில் பிரக்யான் ரோவர் நின்ற இடத்திலிருந்து அப்படியே சுழன்று திரும்பும் காட்சி இடம் பெற்றுள்ளது. பார்ப்பதற்கே பரவசம் ஏற்படுத்தும் வகையில் இந்த காட்சி உள்ளது. இந்த வீடியோ பலரையும் கவர்ந்திழுத்துள்ளது.