கடைசில இந்த பாட்டியையும் "காவாலா" பாட வச்சிட்டீங்களாய்யா!!

சென்னை: இந்தப் பாட்டியை யாராலும் அத்தனை சீக்கிரம் மறக்க முடியாது. டிரெண்டிங்கில் எந்த சினிமா பாட்டு வந்தாலும் சரி, பாட்டி சளைக்காமல் ஒரு ரீல் போட்டு விடுவார். அந்த வகையில் இப்போது காவாலா பாட்டையும் பாட்டியை வைத்து ரீல் போட்டு கலக்கியுள்ளனர்.

இன்ஸ்டாகிராம், ஷேர்சாட் என எங்கு பார்த்தாலும் இந்தப் பாட்டி பிரபலமானவர். அதிரடி பாட்டுக்களையும் அட்டகாசமாக மூவ்மென்ட் கொடுத்து கலக்கக் கூடியவர். ஆட மாட்டார். மாறாக கை,  உடல் மொழி மற்றும் முக அசைவுகளால் கட்டி போட்டு விடுவார் நம்மை.

அழகான சிரிப்பும், கண்களில் பாவனை, பாடல்களின் பீட்டுக்கேற்ப மூவ்மென்ட் என யூத்துகளுக்கு டஃப் கொடுக்கும் இந்தப் பாட்டி பாடாத...ஸாரி வாயசைக்காத பாட்டுக்களே இல்லை என்று சொல்லலாம். பாடல்கள் மட்டும்தான் என்று இல்லை, வசனங்களுக்கு கூட இவர் சூப்பராக நடித்துள்ளார்.

இப்போது தமன்னா ஆடிப் பாடிய ஜெயிலர் படப் பாடலான காவாலா பாட்டுக்கு மூவ்மென்ட் கொடுத்து கலக்கியுள்ளார் பாட்டி. சும்மா சொல்லக் கூடாது.. செமையாக இருக்கிறது. ஒரிஜினலாக ஆடிய தமன்னாவே இதைப் பார்த்து தி பெஸ்ட் என்று பாராட்டித் தள்ளியுள்ளார் என்றால் பாருங்களேன்.

ஒரு ரஜினி பட பாட்டு நடிகைக்காக பிரபலமானது என்றால் அனேகமாக இதுதான் முதல் முறையாக இருக்கக் கூடும். அந்த அளவுக்கு காவாலா பாட்டுககாக தமன்னா வெகுவாக பாராட்டப்பட்டு வருகிறார். அவரைப் போலவே ஆடி பலரும் ரீல்ஸ் போட்டு தமன்னாவை டிவிட்டரில் டேக் செய்து வருகின்றனர். அவரும் அவர்களைப் பாராட்டி வருகிறார்.