இனி இன்னும் கடுமையாக விமர்சிப்பார்கள்.. 2026ல் நமது இலக்கை அடைவோம்.. தவெகவினருக்கு விஜய் அழைப்பு!

சென்னை: கட்சி தொடங்கும் முன்பே நம்மை விமர்சித்தார்கள். இனி இன்னும் கடுமையாக விமர்சிப்பார்கள். ஆக்கப்பூர்வமற்ற விமர்சனங்களை மறந்தும் கூட மனதில் ஏற்றாதீர்கள். 2026ல் நமது இலக்கை அடைவோம்.. ஆக்கப்பூர்வமான அரசியலை மட்டுமே கையில் எடுப்போம் என்று தமிழக வெற்றிக் கழகம் கட்சித் தொண்டர்களுக்கு அதன் தலைவர் விஜய் அறிவுறுத்தியுள்ளார்.

விழுப்புரம் மாவட்டம் விக்கிரவாண்டியில் நடந்த பிரமாண்ட மாநாட்டுக்குப் பிறகு தமிவக வெற்றிக் கழகம் கட்சி, தமிழ்நாட்டு அரசியல் அரங்கில் பேசு பொருளாக மாறியுள்ளது. இந்த நிலையில் விஜய் தனது கட்சித் தொண்டர்களுக்கு ஒரு கடிதம் எழுதியுள்ளார். அந்தக் கடிதத்தில் அவர் பெரும்பாலான பகுதியை நன்றி சொல்ல பயன்படுத்தியுள்ளார். கூடவே கட்சித் தொண்டர்களுக்கு சில அறிவுரைகளையும் அவர் வழங்கியுள்ளார்.

விஜய் கடிதத்தின் முழு விவரம்:

மாநாடு குறித்து உங்களுடன் பேச இது நான்காவது கடிதம் வாஞ்சையில் நனைந்த வார்த்தைகளில் ஒரு நன்றி கடிதம். அரசியலில் கடித முறை என்பது ஆகப்பெரும் ஆயுதம் பேரறிஞர் அண்ணா தந்த ஆயுதம். தமிழக மக்கள் நம் அனைவருக்கும் சொந்தமானது. அந்த உணர்வின் அடிப்படையில்தான் நாமும் அதை கையில் எடுத்தோம். இந்த கடிதம் எழுதும் போது என்னென்னவோ எண்ண அலைகள் இதயத்தில் அலை மோதுகின்றன. என் நெஞ்சம் நிறைந்ததில் எதைச் சொல்வது எதை விடுவது.

மாநாடு நடத்த பல்வேறு காரணங்களால் நமக்கு கிடைத்தது மிகக் குறைந்த கால இடைவெளி தான். அதிலும் அடை மழை வேறு குறுக்கிட்டது. இருந்தும் எல்லாவற்றையும் சமாளித்து சூறாவளியாக சுழன்று நம் கழகத்தின் முதல் மாநில மாநாட்டை வெற்றி பெறச் செய்த உங்கள் அனைவருக்கும் என் மனம் நிறைந்த நன்றி.

குறிப்பாக மாநாட்டு பணிகளுக்காக இடம் தேர்வில் இருந்து திடல் பணிகள் வரை மட்டுமல்லாது மாநாடு வெற்றிகரமாக நிறைவுறும் வரையிலும் கழகத்தின் நிர்வாகிகள் அனைவரையும் ஒருங்கிணைத்து சிரத்தையுடன் பணியாற்றிய நம் கழகத்தின் பொதுச்செயலாளர் ஆனந்த் அவர்கள், திடல் வடிவமைப்பு பணிகளை மேற்பார்வையிட்டு பொதுச் செயலாளருடன் பணிகளை பகிர்ந்து கொண்ட பொருளாளர் பி. வெங்கட்ராமன் அவர்கள், கழகத்தின் மீதான உறுதியான பற்றை இதயத்தில் தாங்கி மாநாட்டிற்காக கடுமையாக உழைத்த ஆர் பரணி பாலாஜி, கள்ளக்குறிச்சி மாவட்ட தலைவர் மற்றும் நிர்வாகிகள் என் மோகன்ராஜ், ஜிபி சுரேஷ், ஏ வடிவேல் மற்றும் அனைத்து மாவட்ட நிர்வாகிகள் அணி நிர்வாகிகள் தற்காலிக தொகுதி பொறுப்பாளர்கள் மாநகர ஒன்றிய நகர பேரூர் கீழே பகுதி கழக நிர்வாகிகள் மாநாட்டு குழுக்களின் தலைவர்கள் ஒருங்கிணைப்பாளர்கள் மற்றும் அனைத்து குழுக்களில் உறுப்பினர்களுக்கும் என் நெஞ்சார்ந்த நன்றியை தெரிவித்துக் கொள்கிறேன்.

தலைமை நிலைய செயலகத்தின் வழிகாட்டுதலை பின்பற்றி திடல் வடிவமைப்பு பணிகளால் வெற்றிக் கொள்கை திருவிழாவிற்கான இடமாக திடலை மாற்றி காட்டிய பந்தல் வடிவமைப்பாளர் ஜே பி விஸ்வநாதன் அவர்களுக்கும் நன்றி. மாநாட்டில் நாம் அனைவரும் மருத்துவர்கள் மற்றும் செவிலியர்கள் ஆற்றிய பணியை மறக்கவே இயலாது. அவசரக்கால உதவியில் அசத்திய இவர்கள் அனைவருக்கும் அளப்பரிய நன்றி. கட்டுப்பாட்டு அறை சார்ந்த கண்காணிப்பு பணிகளைச் செய்தவர்கள் அனைவருக்கும் சிறப்பு நன்றி.

எப்போதும் விவசாய பெருமக்களை வணங்கிப்போற்றும் இயக்கமாக இருக்கும் நம் தமிழக வெற்றி கழகத்தின் முதல் மாநில மாநாடு நடத்த இடம் வழங்கிய விவசாயிகளை நேரில் சந்தித்து அவர்கள் கரம் பற்றி நன்றி சொல்லவே எனக்கு விருப்பம். இருந்தும் இப்போது நெஞ்சம் நெகிழ அவர்களுக்கு நன்றி தெரிவிக்கும் அதே வேளையில் வி சாலை, விக்கிரவாண்டி, விழுப்புரம் மாவட்டம் மக்களுக்கும் நன்றி சொல்லத் தோன்றுகிறது. அவர்கள் அனைவருக்கும் நன்றி. 

மாநாட்டிற்கான நெறிமுறைகளை செவ்வனே செயல்படுத்திட அனுமதி மற்றும் ஒத்துழைப்பு நல்கிய சம்பந்தப்பட்ட பல்வேறு துறைகளைச் சார்ந்த அனைவருக்கும் நன்றி. கடிதங்கள் வாயிலாக வெளியிட்ட என் வேண்டுகோள்களை ஏற்று தங்கள் வீடுகளில் இருந்தே வெற்றிக் கொள்கை திருவிழாவினை கண்டு களித்த அனைத்து தாய்மார்களுக்கும் முதியோர்களுக்கும் என் மனப்பூர்வமான நன்றி. இதனிடையே மாநாட்டில் கலந்து கொள்வதற்காக நீங்கள் ஒவ்வொருவரும் எவ்வளவு தூரம் பயணம் மேற்கொண்டீர்கள் என்பதும் எனக்குத் தெரியும். இரவெல்லாம் கண்விழித்து தூக்கமின்றி அயர்ச்சியை பொருட்படுத்தாமல் மதியம் வரை சுட்டெரித்த வெயிலையும் தாங்கிக் கொண்டீர்கள். சிலர் உடல் உபாதைகளை கூட பொறுத்துக் கொண்டு கலந்து கொண்டீர்கள். இதயங்கள் இடையேயான அன்பின் முன் இன்னல்கள் பெரிதில்லை என்பதை உணரச் செய்தீர்கள். உங்களை எப்படி போற்றுவது என்று எனக்கு தெரியவில்லை.

இப்படி தன்னெழுச்சியாக பொங்கு மாங்கடலென மாநாட்டிற்கு திரண்டு வந்த கழகத் தோழர்கள் என் மீது கொண்டுள்ள பாசத்திற்கு ஈடாக இந்த உலகத்தில் வேறு எதுவும் இருப்பதாகவே தெரியவில்லை. அதேபோல தமிழக அரசியல் களத்தில் நமக்காக நம் தோளோடு தோள் சேர்ந்து நிற்பதை உறுதி செய்வதுபோல தங்களின் பேரன்பையும் பேராதரவையும் தெரிவிக்கும் வகையில் நமது மாநாட்டிற்கு பேரலைகளாக எழுந்து வந்த பொது மக்களுக்கு நன்றி சொல்ல வார்த்தைகளை தேடி தேடி கண்டுபிடிக்க இயலாமல் மவுன மொழி பேசி கண்கள் கலங்க நிற்கிறேன். எதைப்பற்றியும் யோசிக்காமல் இந்த மண்ணைச் சேர்ந்த ஒற்றை மகனுக்காக இத்தனை லட்சம் மனங்கள் திரண்டு நின்றது என் மனதை நெகிழச் செய்து விட்டது. உங்களை உறவுகளாக பெற்றது என் பாக்கியமின்றி வேறென்ன. நாடே வியக்கும் வகையில் நம் மாநாட்டை மாபெரும் வெற்றி பெறச் செய்த உங்கள் ஒவ்வொருவரின் மனதையும் கோடி பூக்களை தூவி போற்றி மனம் நிறைகிறேன்.

உங்கள் ஒவ்வொருவரின் அன்பிலும் மனம் நெகிழ்ந்து கண்களில் ஆனந்தக் கண்ணீர் தேங்க அரசியல் வெற்றி பயணத்தை தொடங்கி இருக்கிறோம். இப்பயனத்தின் இலக்கை நம் தமிழ்நாட்டு மண் இனிவரும் நாட்களில் பார்க்கும். அது உறுதி. நம் தமிழக வெற்றி கழகத்தின் மாநாட்டில் கண்ட காட்சிகள் எல்லாம் கண்களிலும் மனதிலும் கல்வெட்டுகளாகவே பதிந்து விட்டன. தமிழக அரசியல் வரலாற்றில் காலாகாலத்திற்கும் அழிக்கவே இயலாத பதிவுகள் அவை. ஆம் நமது மாநாட்டில் அலைகள் கைதட்டும் ஆர்ப்பரிக்கும் கடலைக் கண்டேன். கதிர்கள் வெடித்து விடும் ஒளி பிழம்புகளைக் கண்டேன். தமிழக வெற்றி கழகத்தின் வெற்றியோடு தமிழகத்தின் வெற்றிக்கான வெள்ளோட்டத்தையும் கண்டேன். தீர்க்கமான அரசியல் வெற்றிக்கான திசைகள் திறக்க கண்டேன். இப்படி சொல்லிக்கொண்டே போகலாம். ஆனால் மனம் திளைத்ததை மகிழ்ச்சியில் தித்தித்ததை இதற்கு மேல் எப்படி சொல்ல. இவை எல்லாவற்றையும் அப்படியே வார்த்தைகளில் வடித்தெடுக்க நான் ஒன்றும் கவிஞன் இல்லை. உணர்வுகளை இயல்பாக வெளிப்படுத்த மட்டுமே தெரிந்த சாதாரண மனிதன். இருந்தும் நினைவுகளை பகிர்வதும் கூட ஒரு அழகிய கவிதை தானே. அதனால் தான் மனதிலும் நினைவிலும் சேகரமானதில் சிலவற்றை மட்டுமே பகிர்ந்தேன்.

இந்த வேளையில் உங்கள் ஒவ்வொருவரையும் எண்ணி மனம் மண் நெகிழ்கிறேன். உங்களை என் தோழர்களாக தூய குடும்ப உறவுகளாக பெற்றது என் வாழ்நாள் வரம். வழியெங்கும் வசந்தத்தை விதைக்கிற வைர நெஞ்சங்கள் நீங்கள். நம் மக்களோடு சேர்ந்து உங்களையும் உயரத்தில் வைத்து அழகு பார்க்கவே இந்த அரசியல் பயணம். என் எல்லா வார்த்தைகளுக்கும் நீங்கள் உயிர் கொடுத்தீர்கள். அதனால் தான் நமது மாநாட்டின் வாயிலாக பொறுப்புணர்வுடன் கூடிய கடமையுடன் கட்டுப்பாடான கண்ணியமான ஆரோக்கியமான உத்வேகமான உரிமைகளை மீட்டெடுக்கும் அரசியலை இந்த மண்ணிலே விதைத்திருக்கிறோம்.

மாநாட்டில் நம்மை கண்ட நம் தமிழகம் மக்களும் அதை உணர்ந்திருப்பர். நம்முடைய அரசியல் பயணத்தை நாம் தொடங்கும் முன்னரே நம்மை விமர்சித்தவர்கள் இனி இன்னும் கடுமையாக விமர்சிப்பார்கள். அத்தகைய விமர்சனங்களில் ஏதேனும் ஆக்கபூர்வமான ஆலோசனைகள் தெரிந்தால் அவற்றை மட்டுமே கருத்தில் கொள்வோம். மற்றவற்றை மறந்தும் கூட மனதில் ஏற்றி விடாமல் கடந்து செல்ல பழகிக் கொள்வோம். 

அனைத்து மக்களின் அத்தியாவசிய தேவைகளை நோக்கிய உழைப்பு மட்டுமே இனி நம் அரசியல். அதை சாத்தியப்படுத்துதல் மட்டுமே நம் தீவிர அரசியல் செய்தலாக இருக்கும். நம்மை தாய் உள்ளத்தோடு வரவேற்கும் நம் தமிழ்நாட்டு மக்களுக்காக இன்னும் அதி தீவிரமாக தீர்க்கமாக தீர்மானமாக உழைப்போம். தங்கள் மண்ணைச் சேர்ந்த மகன்களான மகள்களான நம்மை தக்க இடம் நோக்கி தகுதியான அங்கீகாரம் நோக்கி மக்களை அழைத்துச் செல்வர்.

ஆகவே அவர்களின் மனதில் நிறையும் அளவிற்கு அதிக நம்பிக்கையுடனும் நன்றியுடன் ரெட்டைப் போர் யானைகளின் பலத்துடன் உழைப்போம். வாகை பூக்கள் நமக்காகவே நாடெங்கும் பூத்துக் குலுங்க போகின்றன.

நமது மாநாட்டின் மூலம் வி சாலை நமது வியூக சாலையாகவும் விவேகசாலையாகவும் மற்றும் வெற்றிச்சாலையாகவும் ஆனது போலவே நம்மை யாராலும் வெல்ல இயலாத வித்தியாசமான யதார்த்த அரசியல் சாலைக்கும் நம்மை அழைத்துச் செல்லும். எப்போதும் ஆக்கபூர்வமான அரசியலையே கையில் எடுப்போம் 2026ல் நாம் இலக்கை அடைவோம் என்று விஜய் கூறியுள்ளார்.