"உலக நாயகன்".. கமல்ஹாசனின் "இந்தியன் 2 அறிமுகம்".. "சூப்பர் ஸ்டார்" ரஜினிகாந்த் வெளியிட்டார் !

சென்னை: உலக நாயகன் கமல்ஹாசனின் இந்தியன் 2 அறிமுகம் டீசர் வீடியோவை சூப்பர் ஸ்டார் ரஜினிகாந்த் வெளியிட்டுள்ளார்.

இயக்குநர் ஷங்கரின் முத்திரைப் படங்களில் முக்கியமானது இந்தியன். கமல்ஹாசன், மனீஷா கொய்ராலா, ஊர்மிளாமடோன்கர், நெடுமுடி வேணு, கவுண்டமணி, செந்தில்  உள்ளிட்டோரின் நடிப்பில் உருவாகி மாஸ் வெற்றி பெற்ற பிரமாண்டப் படம்.

ஊழல் மகனாகவும், சுதந்திரப் போராட்ட தியாகியாகவும் - ஊழலுக்கு எதிராக களையெடுக்கும் இந்தியன் தாத்தாவாகவும் கமல்ஹாசன் இரட்டை வேடங்களில் நடித்திருப்பார். படம் அப்போது நாடு முழுவதும் பேசப்பட்டது. 

இப்போது இந்தியன் படத்தின் 2வது பாகத்தை ஷங்கர் எடுத்துள்ளார். இதில் கமல்ஹாசன் மீண்டும் இந்தியன் தாத்தா வேடத்தில் வருகிறார். இந்தப் படத்தின் அறிமுகக் காட்சியை இன்று ஒரே நேரத்தில் பன்மொழிக் கலைஞர்கள் வெளியிட்டனர்.

தமிழ் அறிமுகக் காட்சியை சூப்பர் ஸ்டார் ரஜினிகாந்த் வெளியிட்டுள்ளார். அதேபோல மோகன்லால், அமீர் கான் உள்ளிட்ட பிற திரைப்படக் கலைஞர்கள் அறிமுகக் காட்சியை அந்தந்த மொழிகளில் வெளியிட்டுள்ளனர். 

முதல் பாகத்தைப் போலவே இதிலும் ஊழலுக்கு எதிரான கதையையே களமாக்கியுள்ளார் ஷங்கர் என்று தெரிகிறது. கூடவே கொரோனா சமயத்தில் தட்டுக்களை எடுத்து தெருக்களில், வீடுகளில், வீட்டு மாடிகளில் தட்டிய காட்சிகளும் கூட இடம் பெற்றுள்ளது.

கம் பேக் இந்தியன் என்ற பாடலுடன் கூடிய இந்த அறிமுகக் காட்சி படம் குறித்த மிகப் பெரும் எதிர்பார்ப்பை ஏற்படுத்தியுள்ளது. கடைசியில் இந்தின் இஸ் பேக் என்று கூறும் கமல்ஹாசன் மீண்டும் தாத்தா வேடத்தில் காட்சி தந்து அசத்தியுள்ளார்.

டீசர் பட்டையைக் கிளப்பும் வகையில் உள்ளது.. படம் எப்படி இருக்குமோ.. பொறுத்திருந்து பார்க்கலாம்.