ஜெயிலர் வசூல் எவ்வளவு?.. அதிகாரப்பூர்வமாக வெளியிட்ட சன் பிக்சர்ஸ்

சென்னை : ரஜினி நடிப்பில் வெளியாகி உள்ள ஜெயிலர் படம் கடந்த 2 வாரங்களில் எவ்வளவு வசூல் செய்துள்ளது என்ற விபரத்தை படத்தின் தயாரிப்பு நிறுவனமாவன சன் பிக்சர்ஸ் அதிகாரப்பூர்வமாக வெளியிட்டுள்ளது.

டைரக்டர் நெல்சன் திலீப்குமார் இயக்கத்தில் ரஜினி நடித்த ஜெயிலர் படம் ஆகஸ்ட் 10 ம் தேதி ரிலீசானது. மோகன்லால், ஷிவ் ராஜ்குமார், தமன்னா, ரம்யா கிருஷ்ணன், யோகிபாபு உள்ளிட்ட பலர் நடித்த இந்த படத்தை சன் பிக்சர்ஸ் தயாரித்திருந்தது. சுமார் ரூ.120 கோடி செலவில் எடுக்கப்பட்ட இந்த படம் எவ்வளவு வசூல் செய்தது என்பது பற்றி சோஷியல் மீடியாவில் பலவிதமான கருத்துக்கள் பரவி வருகிறது.

சிலர் ஜெயிலர் படம் பல கோடிகளை வசூலித்து வசூல் சாதனை படைத்து விட்டதாக கூறி வருகிறார்கள். இன்னும் சிலர் அதெல்லாம் கிடையாது என மறுத்து வருகிறார்கள். ஆனால் ரஜினி ரசிகர்கள், உண்மையில் ஜெயிலர் படம் எவ்வளவு தான் வசூல் செய்துள்ளது என தெரிந்து கொள்ள ஆவலாக உள்ளனர். இந்த நிலையில் ஜெயிலர் படத்தின் வசூல் விபரத்தை சன் பிக்சர்ஸ் அதிகாரப்பூர்வமாக வெளியிட்டுள்ளது.

சமீபத்தில் ஜெயிலர் படத்தின் வசூல் ரூ.500 கோடி தாண்டி விட்டதாக அதிகாரப்பூர்வமற்ற தகவல்கள் வெளியாகின. ஆனால் தற்போது ஜெயிலர் படம் கடந்த 2 வாரங்களில் ரூ.525 கோடிகளை வசூல் செய்துள்ளதாக சன் பிக்சர்ஸ் அறிவித்துள்ளது. தற்போதும் ஜெயிலர் படத்திற்கு வரவேற்பு அதிகமாகவே உள்ளது என்றும், தொடர்ந்து வசூல் வேட்டை நடந்து கொண்டிருக்கிறது என்றும் தெரிவித்துள்ளது. தமிழ் சினிமா வரலாற்றிலேயே மிக குறுகிய காலத்தில் இவ்வளவு அதிகமான தொகையை வசூல் செய்து, ஜெயிலர் படம் சாதவை படைத்துள்ளதாக சொல்லப்படுகிறது.