ஆயுத பூஜை கொண்டாடிய சிவகார்த்திகேயன்!

சென்னை: நடிகர் சிவகார்த்திகேயன் தனது அலுவலகத்தில் கொண்டாடிய ஆயுத பூஜை குறித்த புகைப்படம் சமூக வலைதளங்களில் பரவி வருகிறது.

நடிகர் சிவகார்த்திகேயன் குறித்து சமீபத்தில் சர்ச்சை வெடித்தது. இசையமைப்பாளர் டி இமான் அளித்த ஒரு பேட்டியில் சிவகார்த்திகேயன் தனக்கு துரோகம் இழைத்து விட்டதாக  கூறியிருந்தார். இது பெரும் பரபரப்பை ஏற்படுத்தியது. அவர் என்ன துரோகம் செய்தார் என்பதை இமான் தெரிவிக்கவில்லை. இதனால் ஒவ்வொருவரும் வாய்க்கு வந்ததையெல்லாம் விவாதிக்க ஆரம்பித்தனர்.

இந்த விவகாரம் குறித்து சிவகார்த்திகேயன் இதுவரை கருத்து தெரிவிக்கவில்லை. அவர் கருத்து தெரிவிக்காமல் அமைதி காப்பதால் இந்த விவாதமும் முற்றுப்புள்ளி வைக்கப்படாமல், கமா போட்டு போய்க் கொண்டேதான் இருக்கிறது.

இந்த நிலையில் சத்தம் போடாமல், எளிமையாக தனது அலுவலகத்தில் ஆயுத பூஜையைக் கொண்டாடியுள்ளார் சிவகார்த்திகேயன். நடிகர் சிவகார்த்திகேயன் எஸ்கே புரடக்ஷன்ஸ் நிறுவனம் சார்பில் தான் நடிக்கும் படங்களை தானே தயாரிக்கவும் செய்கிறார்.  அந்த நிறுவன அலுவலகத்தில் இன்று ஆயுத பூஜை கொண்டாடினார் சிவகார்த்திகேயன்.

மிகவும் எளிய முறையில் கொண்டாடப்பட்ட இந்த ஆயுத பூஜை விழாவில் யாரெல்லாம் கலந்து கொண்டார்கள் என்பது குறித்துத் தெரியவில்லை.