என்னா வெயிலு.. என்னா வெயிலு.. மண்டையைப் பொளக்குதே.. அனலில் சிக்கிய சென்னை!

சென்னை: சென்னையில் இன்று கடுமையான வெயில் அடித்து மக்களை மிரள வைத்து விட்டது. அனல் காற்றின் காரணமாக பகல் நேரத்தில் வெளியில் வரும் நிலைக்குத் தள்ளப்பட்ட மக்கள் பெரும் அவஸ்தைக்குள்ளாகி விட்டார்கள்.

தமிழ்நாட்டில் கோடை காலம் தனது வேலையைக் காட்டத் தொடங்கி விட்டது. கடும் வெயில் தற்போது அடித்து வருகிறது. அக்னி நட்சத்திரக் காலம் தொடங்கியபோது வங்கக் கடலில் ஏற்பட்ட புயல் காரணமாக  சற்று வெப்பம் குறைந்து மழையும் வந்து சற்று வெப்பத்தைக் குறைத்தது. ஆனால் இப்போது எல்லா ஈரப் பதமும் போய் வெயில் வெளுக்கத் தொடங்கி விட்டது.

பகல் முழுக்க கடும் வெயில் அடிக்கிறது. இரவில் புழுக்கம் நீண்ட நேரம் நீடிப்பதால் மக்கள் பெரும் அவஸ்தைக்குள்ளாகியுள்ளனர். இன்று காலை முதலே வெயில் வெளுத்தெடுத்து வருகிறது. பிற்பகல் 12 மணியளவில் சென்னையில் 104 டிகிரி பாரன்ஹீட்டாக பதிவாகியிலிருந்தது வெயில். வெயில் கடுமையாக அடித்ததால் மக்கள் பெரும் அவஸ்தைக்குள்ளானார்கள்.

வெளியில் வரவே மக்கள் தயங்கும் அளவுக்கு இன்று வெயில் வாட்டி வதைத்து வருகிறது. நேற்றும் இதே அளவில்தான் சென்னையில் வெயில் பதிவாகியிருந்தது. இன்று இன்னும் கூட வெயில் அதிகமாக பதிவாகும் வாய்ப்புகள் உள்ளன.  வெயில் அதிகமாக இருப்பதால் முக்கியச் சாலைகளில் மக்கள் நடமாட்டம் வழக்கத்தை விட குறைந்து காணப்பட்டது.