நமச்சிவாயத்துக்கு நடுக் கடலில் மூழ்கி வாழ்த்து.. ஆஹா.. வேற லெவல்ல இருக்கே!

புதுச்சேரி: புதுச்சேரிக்காரர்கள் எப்பவுமே பிறந்த நாள் வாழ்த்துக் கூறுவதில் தனி பாணியைக் கடைப்பிடித்து வருகின்றனர். அதை மீண்டும் அசத்தலாக நிரூபித்துள்ளனர்.

புதுச்சேரியில் அரசியல் தொண்டர்கள்,  நடிகர்களின் ரசிகர்கள் ஆகியோரிடம் ஒரு வித்தியாசமான வழக்கம் நீண்ட காலமாக கடைப்பிடிக்கப்பட்டு வருகிறது.

தங்களது அபிமானத் தலைவர்கள், நடிகர்களுக்குப் பிறந்த நாள் உள்ளிட்ட ஏதாவது நிகழ்வு வரும்போது நடுக் கடலில் போய் பேனர் கட்டி வாழ்த்து தெரிவிப்பது புது ஸ்டைலாக மாறியுள்ளது. அதேபோல தேர்தலில் வெற்றி பெற்றால், புதுப் படம் ரிலீஸானால் இதெல்லாம் நடக்கும். பார்க்கவே வித்தியாசமாக இருக்கும்.

இந்த நிலையில் புதுச்சேரியின் ஸ்டிராங்மேன், யூனியன் பிரதேச உள்துறை அமைச்சர் நமச்சிவாயத்தின் பிறந்த நாள் செப்டம்பர் 8ம் தேதி வருகிறது.  இதையொட்டி அவரது ஆதரவாளர்கள் இப்பவே கொண்டாட்டங்களை ஆரம்பித்து விட்டனர்.  பல்வேறு நலத்திட்ட உதவிகளோடு தொடர்ந்து கொண்டாடி வருகின்றனர்.

ஆனால் எல்லாக் கொண்டாட்டங்களையும் தூக்கிச் சாப்பிடும் வகையில் அவரது ஆதரவாளரும் பாஜக மாநில செயற்குழு உறுப்பினருமான ஜெயப்பிரகாஷ் நாராயணன் என்பவர் செய்துள்ள செயல் அமைந்து விட்டது. ஆழ்கடல் நீச்சல் வீரர்களை கொண்டு உள்துறை அமைச்சர் நமச்சிவாயத்திற்கு ஆழ்கடலில் போய் பிறந்தநாள் வாழ்த்து பேனர் வைத்துள்ளார் ஜெயப்பிரகாஷ் நாராயணன்.