பிக் பாஸ் தமிழ் 7..  ஆஹா.. புரோமோவே வேற லெவல்ல இருக்கே!

சென்னை: கமல்ஹாசனின் அட்டகாசமான தோற்றத்துடன் கூடிய பிக் பாஸ் தமிழ் 7வது சீசன் குறித்த புரோமோவை விஜய் டிவி வெளியிட்டுள்ளது.

விஜய் டிவியின் ரியாலிட்டி ஷோவான பிக் பாஸ் தமிழ் தமிழ் ரசிகர்களிடையே பெரும் வரவேற்பைப் பெற்ற ஒன்றாகும். இது கிட்டத்தட்ட ஸ்டேஜ்ட் ஒன்றுதான் என்றாலும் கூட மக்களுக்கு நல்லதொரு பொழுது போக்கு அம்சங்களுடன் கூடிய நாடகம் போலத்தான் இருக்கிறது. இதனால் இதைப் பார்க்க மக்களிடையே அதிக ஆர்வமும் உண்டு.

முதல் 6 சீசன்களை வெற்றிகரமாக முடித்து விட்ட விஜய் டிவி தற்போது 7வது சீசனைத் தொடங்க ரெடியாகி விட்டது. இந்த சீசனையும் கமல்ஹாசனே தொகுத்து வழங்கவுள்ளார். இதுதொடர்பான செய்திகள் சமீப காலமாகவே அடிபட்டு வந்தது .யாரெல்லாம் இந்த முறை பிக் பாஸ் வீட்டுக்குள் வரப் போகிறார் என்பது குறித்த யூகங்களும் கொடி கட்டிப் பறந்து வந்தன.

இந்த நிலையில் தற்போது புரோமோ வெளியாகியுள்ளது. கடலுக்கு நடுவே ஒரு நீண்ட பாலம்.. அந்தப் பாலத்தின் நுனியில் கமல்ஹாசன் நிற்கிறார்.. கேமரா அவரை ஜூம் செய்து அருகே போகும்போது, கையில் உள்ள கடிகாரத்தில் நேரத்தைப் பார்த்படியே, திரும்பிப் பார்த்து தனக்கே உரிய புன்னகையுடன் இரு விரல்களை தனது கண்களை நோக்கி வைத்து பின் நம்மை நோக்கிக் காண்பிக்கிறார்.

வேற லெவலில் இருக்கிறது புரோமோ.. இப்பவே வெறியாகுதே.. இனி புரோகிராம் ஆரம்பிச்சு, வீட்டுக்குள் சண்டை களை கட்டும்போது வேற ரகமா  இருக்குமே என்ற எதிர்பார்ப்பில் ரசிகர்கள் மிதக்க ஆரம்பித்து விட்டன.