லண்டன் வீட்டு வாடகை.. விண்ணைத் தொடும் கட்டணங்கள்.. மக்கள் அவதி

லண்டன்: லண்டனில் வீட்டு வாடகை உச்சத்தைத் தொட ஆரம்பித்துள்ளதால் பலரும் அவதிக்குள்ளாகியுள்ளனர்.

இங்கிலாந்து தலைநகர் லண்டனில் எப்போதுமே வாடகை மற்றும் செலவுகள் ஜாஸ்திதான். குறிப்பாக வீட்டு வாடகை அதிகமாகவே இருக்கும். தற்போது அது சாதனை அளவை எட்டும் அளவுக்கு உச்சத்தைத் தொட ஆரம்பித்துள்ளதாம்.

மாத வாடகை ரூ. 3 லட்சம் அளவுக்கு பல பகுதிகளில் உயர்ந்துள்ளதாக தகவல்கள் கூறுகின்றன.  இது இன்னும் அதிகரிக்கும் என்றும் சொல்கிறார்கள். ஏற்கனவே மின் கட்டண உயர்வு உள்ளிட்ட செலவுகள் அதிகரிப்பால், மக்கள் அவதிக்குள்ளாகியுள்ள நிலையில் வீட்டு வாடகையும் அதிகரித்து வருவதால் அவர்கள் திணறலில் மூழ்கியுள்ளனர்.

கடந்த ஆண்டிலிருந்துதான் வீட்டு வாடகை கிடுகிடுவென உயரத் தொடங்கியது.  புதிய வீடுகளுக்கு 9.7 சதவீத அளவுக்கு வாடகை உயர்ந்துள்ளதாம். 

லண்டனைச் சேர்ந்த வங்கி அதிகாரி ஒருவர் தனது வீட்டில் பயன்படுத்தப்படாமல் இருக்கும் 2 கார் நிறுத்துமிடங்களை மாதம் ரூ. 10,000 என்று வாடகைக்கு விட்டிருக்கிறாராம். 6 ஆண்டுகளுக்கு ரூ. 7 லட்சம் என்று அவர் அதை வாடகைக்கு விட்டிருக்கிறாராம்.