பெண்களுக்கு வேலை நேரம் குறைப்பு... அட நம்புங்க.. நம்ம புதுச்சேரியில் தான்!

புதுச்சேரி : வேலைக்கு செல்லும் பெண்களுக்கு வெள்ளிக்கிழமைகளில் வேலை நேரம் 2 மணி நேரம் குறைக்கப்படுவதாக புதுச்சேரி அரசு அறிவித்துள்ளது.

தமிழகத்தில் பணி நேரத்தை 12 மணி நேரமாக மாற்றுவது தொடர்பான சட்ட மசோதா குறித்த விவகாரம் படுதீவிரமாக சென்று கொண்டிருக்கிறது. கடந்த நாட்களாக இதை வைத்தே அரசியல் தலைவர்கள் விதவிதமாக அறிக்கை வெளியிட்டும், கருத்து தெரிவித்தும் வருகின்றனர். சாமானிய மக்கள் துவங்கி, அரசியல் கட்சிகள் வரை 12 மணி நேர வேலை நேரம் பற்றிய பேச்சு தான் தீவிரமாக சென்று கொண்டிருக்கிறது.

இந்த சமயத்தில் புதுச்சேரியில் வேலைக்கு செல்லும் பெண்களுக்கு வெள்ளிக்கிழமைகளில் மட்டும் இரண்டு மணி நேரம் வேலை குறைக்கப்படுவதாக அம்மாநில அரசு அறிவித்துள்ளது. வெள்ளிக்கிழமைகளில் மட்டும் பெண்களுக்கான வேலை நேரம் என்பது காலை 9 மணிக்கு பதிலாக 11 மணியாக மாற்றப்பட உள்ளதாக அறிவிக்கப்பட்டுள்ளது.

வெள்ளிக்கிழமைகளில் வேலைக்கு செல்லும் பெண்களுக்கு வேலை பளு அதிகமாக உள்ளதால் அவர்களுக்கு அன்று ஒரு நாள் மட்டுமாவது காலை பணி நேரத்தை 9 மணி முதல் வேலை நேரம் என்பதை 11 மணி என மாற்ற அரசிடம் பல நாட்களாக கோரிக்கை வைக்கப்பட்டு வந்தது. இந்த கோரிக்கையை ஏற்ற அரசு, உத்தரவாக வெளியிட்டுள்ளது.