வட இந்திய கேங்ஸ்டர்களுக்கு நேரம் சரியில்லை.. திஹார் சிறைக்குள் ஒருவர் அடித்துக் கொலை!

டெல்லி: உத்தரப் பிரதேசத்தில் முன்னாள் கேங்ஸ்டர்கள் ஆதிக் அகமதுவும், அவரது தம்பியும், ஆதிக்கின் மகனும் சுட்டுக் கொல்லப்பட்ட பரபரப்பு ஓய்வதற்குள் டெல்லி திஹார் சிறைக்குள் ஒரு கேங்ஸ்டர் அடித்துக் கொல்லப்பட்ட சம்பவம் நடந்துள்ளது.

இன்று அதிகாலையில் இச்சம்பவம் நடந்துள்ளது. கொல்லப்பட்ட நபரின் பெயர் தில்லு தஜ்பூரியா. இவரை எதிர்கோஷ்டியைச் சேர்ந்தவர்கள் இரும்புக் கம்பிகளால் அடித்தே கொன்று விட்டனர். தில்லு தஜ்பூரியா என்கிற சுனில் மானுக்கும், யோகேஷ் துண்டா என்ற இன்னொரு கேங்ஸ்டர் கோஷ்டிக்கும் இடையே நீண்ட நாள் விரோதம் இருந்து வந்தது.

 

இந்த நிலையில் சிறையில் அடைக்கப்பட்டுள்ள தில்லுவை தீர்த்துக் கட்ட யோகேஷ் துண்டா கோஷ்டி திட்டமிட்டு வந்தது. அதன்படி அந்தக் கோஷ்டியைச் சேர்ந்த சிலர் கைதிகளாக  சிறைக்குள் ஊடுறுவியிருந்தனர். இன்று தோதாக சமயம் கிடைத்ததால் தில்லுவைத் தீர்த்துக் கட்டி விட்டனர்.

படுகாயமடைந்த நிலையில் ரத்த வெள்ளத்தில் மிதந்த தில்லுவை தீன் தயாள் உபாத்யாய் மருத்துவமனைக்குக் கொண்டு சென்றனர். ஆனால் அவர் ஏற்கனவே இறந்து விட்டதாக டாக்டர்கள் தெரிவித்தனர். இந்தத் தாக்குதலில் ரோஹித் என்ற இன்னொரு கைதியும்காயமடைந்தார். அவரது உயிருக்கு ஆபத்தில்லை.

2021ம் ஆண்டு ரோஹினி கோர்ட் வளாகத்தில் நடந்த துப்பாக்கிச் சூட்டில் ஜிதேந்தர் கோகி என்ற கேங்ஸ்டர் சுட்டுக் கொல்லப்பட்டார். அந்த கொலை வழக்கில் முக்கிய சதிகாரரே இந்த தில்லுதான்.வக்கீல்கள் போல வேடம்  போட்டு கோர்ட்டுக்குள் புகுந்த தில்லுவின் கூலிப்படையைச் சேர்ந்த 2 பேர் கோகியை சுட்டுக் கொன்றனர். போலீஸார் திருப்பிச் சுட்டதில் இந்த இரண்டு பேரும் பலியானார்கள்.