காங்கிரஸ் வெளியிட்ட முழுப்பக்க விளம்பரம்.. காமராஜர் மிஸ்ஸிங்.. தலைவர்கள் அப்செட்!

சென்னை: சட்டீஸ்கர் மாநிலம் ராய்ப்பூரில் நடைபெற்ற காங்கிரஸ் கட்சியின் 85வது மாநாட்டையொட்டி காங்கிரஸ் தலைமை வெளியிட்ட நாளிதழ் விளம்பரம் தமிழ்நாட்டில் சர்ச்சையைக் கிளப்பியுள்ளது.

ராய்ப்பூரில் காங்கிரஸ் கட்சியின் 85வது மாநாடு நடைபெற்றது. வெள்ளிக்கிழமை தொடங்கிய மாநாட்டுக்கு இன்றுதான் கடைசி நாள். இதையொட்டி  ஒரு முழுப்பக்க அளவிலான விளம்பரத்தை அனைத்து நாளிதழ்களிலும் காங்கிரஸ் கட்சி கொடுத்திருந்தது.

இந்த விளம்பரம் தற்போது சர்ச்சையைக் கிளப்பியுள்ளது. காங்கிரஸ் கட்சிக்காக விசுவாசமாக பாடுபட்ட மூத்த தலைவர்கள் பலரது படங்கள் அதில் இடம் பெறவில்லை என்று சர்ச்சை கிளம்பியுள்ளது. இது காங்கிரஸ் கட்சியினரிடையே கூட  அதிருப்தியை ஏற்படுத்தியுள்ளது. 

இந்த விளம்பரம் குறித்த தனது அதிருப்தியை மூத்த காங்கிரஸ் தலைவர்களில் ஒருவரான பீட்டர் அல்போன்ஸ், டிவிட்டரில் வெளியிட்டுள்ளார். அவர் கூறுகையில், அகில இந்திய காங்கிரஸ் கமிட்டி ரெய்ப்பூரில் நடக்கும் மாநாட்டிற்கு  முழுப்பக்க விளம்பரங்களை வெளியிட்டுள்ளது. காங்கிரஸ் பேரியக்கத்தின் முன்னோடி தலைவர்கள் மவுலானா அபுல் கலாம் ஆசாத், பெருந்தலைவர் காமராஜர், பாபு ஜெகஜீவன் ராம் படங்கள் இடம் பெறாதது வருத்தமளிக்கிறது.

சுதந்திர போருக்கும், காங்கிரஸ் பேரியக்கத்திற்கும் இஸ்லாமிய தலைவர்களின்  பங்களிப்பை நாமாவது அங்கீகரிக்க வேண்டும். பெருந்தலைவர் இரண்டு பிரதமர்களை அடையாளம் கண்டு காங்கிரஸை காத்தவர். அண்ணல் அம்பேத்கர் ஒடுக்கப்பட்ட மக்களின் பாதுகாவலர். பாபு ஜெகஜீவன் ராம் அப்பழுக்கற்ற காங்கிரஸ்காரர் என்று அவர் கூறியுள்ளார்.

காங்கிரஸ் கட்சியினர் இப்படி அதிருப்தியை வெளியிட்டுள்ள நிலையில், பாஜக உள்ளிட்ட க ட்சியினர், காங்கிரஸைக் கிண்டலடித்து வருகின்றனர். பெருந்தலைவர் காமராஜரையே மறந்து விட்ட காங்கிரஸ், தமிழ்நாட்டில் எந்த முகத்தை வைத்துக் கொண்டு வலம் வருகிறது என்று அவர்கள் விமர்சிக்கின்றனர்.