பொங்கல் முதல்..  வெங்கடேஷ், ஆர்யாவின்... "சைந்தவ்"!

சென்னை: வெங்கடேஷ் நடித்து, தமிழ் மற்றும் தெலுங்கில் உருவாகியிருக்கும் சைந்தவ் படத்தில் நடிகர் ஆர்யாவும் இணைந்துள்ளார் .  பொங்கல் பண்டிகையை ஒட்டி ஜனவரி 13ஆம் தேதி படம் திரைக்கு வருகிறது.

தமிழ் சினிமாவில் முன்னணி நடிகராக வலம் வருபவர் நடிகர் ஆர்யா. இவர் நடித்த அவன் இவன், நான் கடவுள், மதராசபட்டினம், சார்பட்டா பரம்பரை போன்ற படங்கள் ரசிகர்களிடம் நல்ல வரவேற்பு பெற்று வெற்றி பெற்றறது. அதனை தொடர்ந்து அவர் நடித்த அரண்மனை 3, எனிமி, காதர்பாட்சா போன்ற படங்கள் பெரிதாக போகவில்லை. 

கஜினிகாந்த் என்ற படத்தில் நடித்தபோது உடன் நடித்த நடிகை சாய்ஷாவுடன் காதலில் விழுந்த ஆர்யா, 2019 ஆம் ஆண்டு பெற்றோர் சமமத்துடன் திருமணம் செய்து கொண்டனர். இவர்களுக்கு அர்யானா என்ற மகள் இருக்கிறாள்.

தற்போது சைந்தவ் என்ற படத்தில் மானஸ் என்ற கதாபாத்திரத்தில் ஆர்யா நடித்துள்ளார். நீண்ட தலைமுடி உடைய ஸ்டைலான தோற்றத்தில் கையில் துப்பாக்கியுடன் ஆர்யா உள்ள புகைப்படம் அண்மையில் வெளிவந்தது. இந்த புகைப்படம் சமூக வலைத்தளங்களில் வைரலானது.

நடிகர் வெங்கடேஷ் இப்படத்தில் முதன்மை கதாபாத்திரத்திலும், நடிகர் ஆர்யா ஸ்டைலான கதாபாத்திரத்திலும் நடித்துள்ளனர். பாலிவுட்டை சேர்ந்த பன்முகத் தன்மை கொண்ட நடிகரான நவாசுதீன் சித்திக், விகாஸ் மாலிக் கதாபாத்திரத்தின் மூலம் டோலிவுட்டில் அறிமுகம் ஆகிறார். இப்படத்தின் நாயகி ஷ்ரதா ஸ்ரீநாத் மனோயா என்ற கதாபாத்திரத்தில் நடித்துள்ளார். இவர்களுடன் ருகானி ஷர்மா, ஆண்ட்ரியா ஜெர்மியாவும் நடித்துள்ளனர்.

தெலுங்கில் பல  ஹிட் படங்களை கொடுத்த சைலேஷ் கொலானு சைந்தவ் படத்தை இயக்கியிருக்கிறார். சந்தோஷ் நாராயணன் இசையமைத்துள்ளார்.