மதுரை குலுங்க குலுங்க.. சித்திரை திருவிழா ஏப்ரல் 23 கொடியேற்றத்துடன் துவக்கம்!
Mar 30, 2023,03:47 PM IST
மதுரை : உலகப் புகழ்பெற்ற மதுரை சித்திரை திருவிழா ஏப்ரல் 23 ம் தேதி கொடியேற்றத்துடன் துவங்க உள்ளது. இதற்கான முழு அட்டவணையை மதுரை மீனாட்சி அம்மன் கோவில் நிர்வாகம் சமீபத்தில் வெளியிட்டுள்ளது.
2023 ம் ஆண்டிற்கான மதுரை மீனாட்சி அம்மன் கோவில் சித்திரை திருவிழா ஏப்ரல் 23 ம் தேதி காலை 10.35 முதல் 10.59 மணிக்குள் கொடியேற்றத்துடன் துவங்குகிறது. ஏப்ரல் 30 ம் தேதி இரவு 07.05 மணி முதல் 07.29 மணி வரை மீனாட்சி பட்டாபிஷேகம் நடைபெற உள்ளது.
மே 01 ம் தேதி திக்விஜயமும், மே 02 ம் தேதி காலை 08.35 மணி முதல் 08.59 மணிக்குள் திருக்கல்யாண வைபவம் நடக்கிறது. மே 03 ம் தேதி காலை 06.00 மணிக்கு துவங்கி தேரோட்டம் நடைபெற உள்ளது. மே 04 ம் தேதி மீனாட்சி அம்மன் கோவில் சித்திரை திருவிழா நிறைவடைகிறது.