கர்நாடக தேர்தல் பிரச்சாரம்.. காங்கிரஸுக்குக் "கை" கொடுக்க செல்கிறார்.. கமல்ஹாசன்!

சென்னை: கர்நாடக சட்டசபைத் தேர்தலில், காங்கிரஸ் கட்சிக்காக பிரச்சாரம் செய்ய மக்கள் நீதி மய்யம் கட்சித் தலைவர் நடிகர் கமல்ஹாசன் செல்லவுள்ளார்.

காங்கிரஸ் மற்றும் திமுகவுடன் சமீப காலமாக நெருக்கம் காட்டி வருகிறார் கமல்ஹாசன். ராகுல்காந்தி நடத்திய பாரத் ஜோடோ யாத்திரையின்போது டெல்லிக்குச் சென்று ராகுல் காந்தியுடன் நடந்தார். ஈரோடு கிழக்கு சட்டசபைத் தொகுதி இடைத் தேர்தலின்போது காங்கிரஸ் வேட்பாளர் ஈவிகேஎஸ் இளங்கோவனுக்காக பிரச்சாரம் செய்தார்.

அதேபோல திமுக தலைவரும், முதல்வருமான மு.க.ஸ்டாலின் பிறந்த நாளையொட்டி சென்னையில் நடந்த புகைப்படக் கண்காட்சியை கமல்ஹாசன்தான் தொடங்கி வைத்தார். சென்னையில் தொடங்கி பல்வேறு ஊர்களிலும் இந்த புகைப்படக் கண்காட்சி நடைபெற்றது. 

இந்த நிலையில் தற்போது கர்நாடக சட்டசபைத் தேர்தலில் காங்கிரஸ் கட்சிக்காக பிரச்சாரம் செய்யப் போகிறார் கமல்ஹாசன்.  மே முதல் வாரத்தில் கமல்ஹாசன் கர்நாடக தேர்தல் பிரச்சாரத்தை மேற்கொள்வார் என்று தெரிகிறது. கமல்ஹாசன் பிரச்சாரம் செய்ய வேண்டும் என்று ராகுல் காந்தி அழைப்பு விடுத்திருந்தாராம். அதை ஏற்று கமல்ஹாசன் பிரச்சாரம் செய்யவுள்ளார்.