அதெல்லாம் கிடையாது.. மதுராவில்தான் மறுபடியும் போட்டியிடுவேன்.. ஹேமமாலினி

மதுரா: மீண்டும் லோக்சபா தேர்தலில் போட்டியிடுவதாக இருந்தால் மதுரா தொகுதியிலிருந்து மட்டுமே போட்டியிடுவேன். வேறு தொகுதிக்கு மாற மாட்டேன் என்று கூறியுள்ளார் அத்தொகுதியின் எம்.பியும், பாஜகவைச் சேர்ந்தவருமான நடிகை ஹேமமாலினி.

ஹேமமாலினி உத்தரப் பிரதேச மாநிலம் மதுரா தொகுதியிலிருந்து கடந்த 2 முறையாக உறுப்பினராக இருந்து வருகிறார். வரும் லோக்சபா தேர்தலில் அவர் இதே தொகுதியில் போட்டியிடுவாரா அல்லது தொகுதி மாறுவாரா என்ற பேச்சு இப்போது கிளம்பியுள்ளது.

இதுகுறித்து அவர் விளக்கம் அளித்துள்ளார். இதுதொடர்பாக ஹேமமாலினி கூறுகையில், மீண்டும்  நான் தேர்தலில் போட்டியிடுவதாக இருந்தால் மதுரா தொகுதியில்தான் போட்டியிடுவேன்.  வேறு தொகுதியில் போட்டியிடச் சொன்னால் போட்டியிட மாட்டேன்.  கட்சி மதுராவில் போட்டியிடச் சொல்லும் என்றே நம்புகிறேன்.

மதுரா மீதும், மதுரா மக்கள் மீதும் எனக்கு உள்ள அன்பு அபரிமிதமானது. அதை விட முக்கியமாக கிருஷ்ணர் மற்றும் அவரது பக்தர்களை உயிருக்கு உயிராக நேசிக்கிறேன். அவர்களுக்குத் தொடர்ந்து சேவை செய்ய விரும்புகிறேன்.

பிரதமர் நரேந்திர மோடி 3வது முறையாக பிரதமர் ஆவார். கடந்த 9 ஆண்டு கால பாஜக ஆட்சி இதை உறுதி செய்யும் என்றார் ஹேமமாலினி.