ஊழலுக்கு எதிராக ஜூனில் பாதயாத்திரை... ராகுலை தொடர்ந்து அண்ணாமலையும் புறப்படுறார்

சென்னை : ஊழலுக்கு எதிராக ஜூனில் பாதயாத்திரை துவங்க உள்ளதாக தமிழக பாஜக தலைவர் அண்ணாமலை தெரிவித்துள்ளார். என் மண் என் மக்கள் என்ற பெயரில் பாதயாத்திரை நடத்தப்பட உள்ளதாக அவர் தெரிவித்துள்ளார்.

திமுக.,வின் ஊழல் மற்றும் சொத்து விபரங்களை ஏப்ரல் 14 ல் வெளியிட போவதாக அறிவித்த தமிழக பாஜக தலைவர் அண்ணாமலை, சொன்னபடியே பட்டியலை வெளியிட்டார். அதோடு தான் காவல் துறையில் இருக்கும் போது வாங்கிய லஞ்சப் பணத்தில் ரஃபேல் வாட்ச் வாங்கியதாக திமுக.,வினர் கிளப்பி விட்ட குற்றச்சாட்டிற்கும் அவர் பதிலளித்தார். DMKFiles என்ற பெயரில் திமுக.,வின் ஊழல் பட்டியலை வெளியிட்ட அண்ணாமலை, இது பார்ட் 1 தான். இது போல் தொடர்ந்து இந்த ஆண்டு முழுவதும் வெளியிட உள்ளதாக அவர் தெரிவித்துள்ளார்.

தொடர்ந்து செய்தியாளர்களிடம் பேசிய அண்ணாமலை, ஊழல் பட்டியலை பார்ட் 4 வரை வெளியிடுவேன். வேறு வேறு கட்சிகளும் அதில் இடம்பெறும். ஊழலை எதிர்க்க ஆரம்பித்தால் ஒரு கட்சியை மட்டும் எதிர்க்க முடியாது. மொத்தமாக எதிர்க்க வேண்டும். திமுக அரசின் அனைத்து ஊழல்களையும் வெளியிடுவேன். ஸ்டாலின் குடும்பத்தினர், திமுக அமைச்சர்களின் கணக்கில் வராத அனைத்து சொத்துக்களையும் வெளியிடுவேன். இப்போது நேரடி சொத்து விபரத்தை மட்டுமே வெளியிட்டுள்ளேன். இனி பங்குகள், பங்குதாரர்களின் சொத்து விபரங்கள் உள்ளிட்ட அனைத்தும் வெளியிடப்படும்.

உலக அளவில் திமுக கட்சிக்கு எப்படி இவ்வளவு பணம் வந்தது என்பது தான் என்னுடைய கேள்வி.  திமுக.,வின் ஊழல்களை அம்பலப்படுத்த ஜூன் முதல் வாரத்தில் பாத யாத்திரை துவங்க உள்ளேன். எங்கள் கட்சியின் தலைவர்கள் பலரும் இதில் பங்கேற்க உள்ளனர். தமிழக கட்சிகளின் ஊழல்களை மக்களிடம் கொண்டு சேர்க்காமல் நான் நிறுத்த போவதில்லை. ஒவ்வொரு பாஜக தொண்டரும் இந்த யாத்திரையில் பங்கேற்பார்கள் என்றார்.