ஓய்வை அறிவித்தார் சென்னை சூப்பர் கிங்ஸ் வீரர் அம்பதி ராயுடு

டெல்லி : குஜராத் டைட்டன்ஸ் அணிக்கு எதிராக இன்று நடைபெறவுள்ள ஐபிஎல் 2023 பைனலுடன் ஐபிஎல் கிரிக்கெட்டில் இருந்து ஓய்வு பெற உள்ளதாக அறிவித்துள்ளார் சென்னை சூப்பர் கிங்ஸ் அணியின் வீரர் அம்பதி ராயுடு.

ஐபிஎல் 2023 கிரிக்கெட் போட்டியின் பைனலில் சென்னை சூப்பர் கிங்ஸ் மற்றும் குஜராத் டைட்டன்ஸ் அணிகள் மோதுகின்றன. இந்த போட்டி நேற்று (மே 28) நடைபெற இருந்த நிலையில், மழை குறுக்கிட்டதால் ரிசர்வ் டே என சொல்லப்படும் இன்று (மே 29) அகமதாபாத்தில் உள்ள நரேந்திர மோடி ஸ்டேடியத்தில் நடைபெற உள்ளது.

இந்நிலையில் ஐபிஎல் 2023 பைனலை முன்னிட்டு, சென்னை அணி வீரர் அம்பதி ராயுடு ஒரு ட்வீட் போட்டிருந்தார். அதில் தனது ஓய்வை அறிவித்து ரசிகர்களுக்கு அதிர்ச்சி கொடுத்துள்ளார். அந்த ட்வீட்டில் அவர், இரண்டு சிறப்பான அணிகள் மும்பை இந்தியன்ஸ் மற்றும் சென்னை சூப்பர் கிங்ஸ், 204 போட்டிகள், 14 சீசன்கள், 11 பிளேஆஃப்கள், 8 பைனல்கள், 5 கோப்பைகள். ஆறாவது கோப்பை இன்று இரவு கிடைக்கும் என நம்புகிறேன். 

அத்தோடு இந்த பயணத்தில் இருந்து விலகுகிறேன். இன்று இரவு விளையாட உள்ள போட்டி ஐபிஎல் விளையாட்டில் எனது கடைசி போட்டி என முடிவு செய்துள்ளேன். நிஜமாகவே இந்த தொடரை மிகவும் ரசித்தேன். அனைவருக்கும் நன்றி. இப்போது உங்களின் தருணம்" என குறிப்பிட்டுள்ளார்.