பிறந்தது 2023.. விற்றுத் தீர்ந்தது 3.5 லட்சம்.. எது மாப்ளே??.. "ஸ்விக்கி பிரியாணி"தான் மாமா!

டெல்லி: புத்தாண்டையொட்டி சனிக்கிழமை ஒரே நாளில் பிரியாணியை செம பிடி பிடித்துள்ளனர் இந்தியர்கள். நாடு முழுவதும் ஸ்விக்கி நிறுவனம் மட்டும் 3.5 லட்சம் பிரியாணியை டெலிவரி செய்து அதிர வைத்துள்ளது.

டிசம்பர் 31ம் தேதி அவர்கள் எடுத்த ஆர்டரில் 75.4 சதவீதம் ஆர்டர்கள் ஹைதராபாத் பிரியாணிக்கு போயுள்ளது. அடுத்த இடம் லக்னோவி பிரியாணி.. இதை 14.2 சதவீதம் பேர் வாங்கியுள்ளனர். கொல்கத்தா 10.4 சதவீதத்துடன் 3வது இடத்தைப் பிடித்துள்ளது.

இதுதவிர நாடு முழுவதும் 61,000 பீட்சாக்களையும் டெலிவரி செய்துள்ளது ஸ்விக்கி.  நேற்று ஸ்விக்கி டெலிவரி செய்த உணவுகளிலேயே பிரியாணிதான் முதலிடத்தில் உள்ளது.

ஹைதராபாத்தைச் சேர்ந்த பிரபலமான பவார்ச்சி ஹோட்டல், கடந்த 2021ம் ஆண்டு புத்தாண்டின்போது நிமிடத்திற்கு 2 பிரியாணி வீதம் சப்ளைசெய்து சாதனை படைத்திருந்தது. இந்த ஆண்டு டிசம்பர் 31ம் தேதி அவர்கள் 15 டன் பிரியாணி செய்து சப்ளையில் பிரச்சினை வராமல் பார்த்துக் கொண்டனராம்.

ஸ்விக்கியின் இன்ஸ்டாமார்ட், சனிக்கிழமை இரவு 7 மணி வரை 1.76 லட்சம் சிப்ஸ் பாக்கெட்களை டெலிவரி செய்துள்ளது.

ஆணுறைகளுக்கும் பஞ்சமே இல்லை

அதேபோல ஸ்விக்கியின் இன்ஸ்டாமார்ட், சனிக்கிழமை 2757  டூரக்ஸ் ஆணுறைகளை டெலிவரி செய்துள்ளது.  ஸ்விக்கி இன்ஸ்டாமார்ட் பல்வேறு பொருட்களையும் வாடிக்கையாளர்களுக்கு சப்ளைசெய்து வருவது குறிப்பிடத்தக்கது.